江南西一间人均20嘅餐吧，饮完嘢仲可以带埋只杯走，仲有慢递服务！
2015/2/8 广州笋嘢益街坊
江南西出名小店多，好多人都会选择去嗰度行街食饭。不过咁多小店，你有冇眼花缭乱，唔知拣边间嘅感觉？作为一个资深食货，小师妹几乎去遍江南西所有嘅小店，有一间餐厅，係我觉得最抵食最抵玩嘅。
呢间咁抵食抵玩嘅小店，就係窝居啦。呢度有室外露天位同室内卡座选择，想free D嘅朋友仔，可以拣坐室外，不过我就怕冻，都係坐入面好。
里面嘅布置好舒适，真係有一种“蜗居”喺屋企嘅感觉，而且灯光唔会太光猛，好适合三五知己或者係情侣们喺度倾密计。
除咗有情调，仲好有艺术feel添，咁靓嘅布景，够晒小资啦~
唔讲咁多啦，个个都嗌肚饿，不如点D嘢嚟食下先。翻咗下菜牌，发现呢度嘅消费都唔贵，10零蚊就有一款主食，而且下昼五点前仲有优惠套餐，平过出面D西餐厅多多声。
鸡扒块鸡扒真係超大件，好厚身，呢个价钱有噉嘅分量真係有D吓亲我!不愧咁多资深食货推荐!蜜汁係窝居自己调配嘅，味道咸鲜兼有D甜味，淋落鸡扒度，等鸡扒吸收晒之后，再捞埋意粉一齐食，好好味啊!O(∩_∩)O
海鲜炒饭哇~炒饭色水好靓啊，炒到金黄灿烂嘅米饭，加上虾仁、八爪鱼、蟹柳、洋葱丝、萝卜粒等食材嘅点缀，简直係色香味俱全!
肉酱意粉
食过咁多芝士肉酱意粉，我就最钟意窝居嘅呢个啦。酸酸甜甜嘅肉酱混合爽滑嘅意粉，香喷喷，而且表面铺咗一层好浓郁嘅芝士，烤到好幼嫩，意粉就爽嫩，同芝士肉酱味mix得perfect!
将意粉同芝士肉酱捞匀之后，每一条意粉都蘸上芝士肉酱嘅香味，食落口口感超正!
海鲜炒意粉
呢个炒意粉，就比较干爽啦。同样都係用海鲜炒，令意粉嘅味道更加鲜甜，海鲜多到爆，入口爽嫩弹牙，好鬼正!
肥牛饭
想食得港式D嘅，不妨试下呢个肥牛饭，牛肉爽口香滑，肉质好结实，加上师傅调配嘅酱汁，满满噉淋喺碟度，捞饭食不得了，唔知可唔可以加饭捏~~~
愉快
哈哈，问过侍应先知道，所谓嘅“窝居愉快”其实就係鱼块，鱼块表面炸到金黄酥脆，但係内里嘅鱼肉仲係十分幼嫩，外酥内嫩，口感无敌!
芝士肠
呢几条肠仔唔係普通嘅肠仔，而係香浓嘅芝士肠!入口真係食到有芝士味，而且表皮好脆，一啖咬落去，成条肠都唔会散开，仲保持到“肠形”。我就钟意蘸D千岛酱一齐食啦，香到爆!
芝士治
呢个三文治嘅分量多到惊人!足足有成四件!而且中间夹住两块午餐肉、一片芝士，午餐肉好鬼厚身，而且肉质好新鲜，完全唔係罐头货，唔干身。
西多士
呢个港式嘅小食，内层涂满花生酱，外层蘸满蛋液，经过油炸之后，好香脆，食嘅时候再点D牛油，仲正啊!
芝士棍
芝士棍係呢度嘅人气小食，好多人嚟呢度都必点!
一啖咬开，芝士嘅拉丝效果超级正!霎时间，浓郁嘅芝士香味瞬间入侵我味蕾，脆香嘅表面，柔软嘅芝士，好食到飞起~
提拉米苏
作为意大利甜品嘅代表，提拉米苏一直都得到我嘅青睐。浓郁嘅咖啡风味，加上芝士同奶油嘅稠香，味道好醇厚，口感滑嫩，入口即化。
介绍咗咁多美食，都要有一杯饮品落肚先至完美。窝居嘅饮品，我最钟意嘅就係盆栽奶茶，因为呢度嘅每只杯都係独一无二，客人饮完嘢可以带走只杯，喺杯里面种植物，令佢唔再只係一杯饮品咁简单。
流星雨
呢度嘅杯，比起其他餐厅嘅杯，都要特别。无论係杯嘅颜色，抑或係杯嘅图案花纹，都可以话，係独一无二嘅。
七彩陨石
就算係颜色相同嘅两只杯，仔细D睇，都可以睇出唔同。因为喺烧制过程里面，保证唔到每一滴色釉都係固定嘅，所以就造就咗每一只独一无二嘅杯诞生，就好似人类嘅DNA一样，感觉好奇妙。
落英缤纷
食一粒面头嘅棉花糖，感受柔软绵滑嘅口感，丝丝香甜，甜到入心。再用咖啡匙将奶茶同奥利奥碎搅匀，奶茶特有嘅香味即刻氤氲而生。忍唔住饮一啖先，奶香中透出红茶嘅清香，茶香里面又夹杂奶嘅香甜——叫我如何不爱。
宇宙红豆记得梁静茹有一首歌叫《情歌》，里面有句歌词“一整个宇宙换一颗红豆”，红豆係爱情嘅象征，用全宇宙去换取人世间最美好嘅爱情，简直係最浪漫嘅事。
甜蜜蜜嘅红豆，除咗同抹茶match之外，原嚟同奶茶都一样绝配。寄思念于红豆之中，如果有一个人，请你饮红豆奶茶，你一定要记得，红豆背后浪漫嘅含义——愿君多采撷，此物最相思。
希望树传统嘅盆栽奶茶，冇太多花巧嘅装修，但係却令我深深感受到乜嘢係生命力、乜嘢係希冀。
佢就好似係地球上嘅一棵小草，即使周围环境恶劣，但係亦努力茁壮成长，唔放弃自己，呢种充满生机嘅朝气深深打动我，霎时不禁觉得，做人更要努力向上!
除咗饮饮食食，窝居仲可以寄明信片噶!呢度门口有只好大嘅邮筒，可以提供“慢递服务”，畀大家体验一次预约未来幸福嘅机会。
咁多款明信片，寄畀自己，寄畀朋友，寄畀屋企人都得。
嚟到窝居，点一杯盆栽奶茶，几款小食，顺便向服务员索取一张明信片，写低此时此刻嘅心情寄语。呢一刻，我最想写嘅，係希望以后嘅自己，可以成长为一个独立坚强嘅女仔。
如果係寄畀自己，记得喺落款度写低选择寄出嘅日期，窝居支持最长达1年嘅“慢递”服务。
写好之后，贴上邮票，就可以放入邮筒啦，等待邮递员嘅接收。
等待收到明信片嘅过程，谂下都有D小激动，唔知到时收到明信片嘅时候，postcard上嘅嘢，会唔会变成现实呢。
小编总结
江南西呢间窝居，地方虽然唔係好大，但係就係呢种有D逼嘅感觉，先可以最大程度噉拉近小伙伴们之间嘅距离，大家食下呢度嘅平价高质小食，顺便讲讲笑笑，够晒warm，够晒free，先叫做聚会噶嘛!
优惠活动
凡消费指定盆栽饮品一杯，即送复古马克杯和豌豆种子、泥土一份。
窝居
人均：25元
地址：海珠区江南西路青竹大街5号102号铺(近江南新村第一小学青凤校区)
电话：020-34277540、13711627742
营业时间：11:00——24:30
http://www.duyihua.cn
返回 广州笋嘢益街坊 返回首页 返回百拇医药